الحال حيكون كيف لو ما كنت سوداني؟؟؟؟؟؟

wdsuliman الخميس سبتمبر 24, 2009 7:45 pm

تخيل كيف يكون الحال لو ما كنت سوداني:
كنت ح تلتزم بالمواعيد..
كنت ح تتصل بالتلفون قبل زيارة أحد في منزله بدري شويه, مش و أنت في خشم الباب...
كنت انتظرت دورك في الصف..
ولم تتفنن في تجاهله أو الوصول إلى مقدمته بأي صورة...
كنت ح تنهر أولادك لما يبهدلوا ليهم بيت زول..
و كنت ح تتردد في أخذهم معاك المرة الجاية لنفس البيت, علشان يبهدلوه مرة تانية...
كنت ح تدفع ال share بتاعك في العشاء الجماعي دون ملاحقة.. أو سك من منظمي المناسبة المتوكحين بالفاتورة...
كنت ح تتردد في إعطاء رقم تلفون أو عنوان شخص ما دون إذنه...
كنت ح تتكلم بلسانك و ليس لسان كل من يحمل الجواز الأخضر..
كنت ح تتوقع يحصل شنو لما ترقد طفلك الصغير, دون بامبرز في سرير في بيت الناس..
كنت ح تلبس حزام الأمان في السيارة..
وكنت امتنعت عن السماح بجلوس طفلك الرضيع في المقعد الأمامي على حجر والده او والدته...
كنت ح تترد في زيارة شخص ما أنصاص الليلي و صابح يوم مدارس و عمل...
كنت ح تخلي الصغار في البيت عندما تكون المناسبة مناسبة كبار...
كنت اتونست بصوت معقول, حصوصا" عندما يكون الطرف الأخر قاعد جنبك في نفس الكنبة.. و يا حبذا عندما يكون الطرف الاخر
ساكت...
كنت رجعت الكتب الشيلتها من الناس التانية والشرايط برضة ...................
كنت امتنعت عن التدخين في منزل شخص اخر, او على الاقل استأذنت قبل ما تولع...
كنت ترددت في ارسال حاجات وزنها خمسة كيلو و ما فوق مع كل من تسمع بأنه ماشي السودان...
كنت رجعت القروش الاستلفتها في وقتها, أو في الحقيقة رجعتها و بس..
كنت امتنعت عن زيارة احدهم في مكتبه , للونسه او مناقشة امور لا صله لها بالعمل..
كنت خجلت من عدد المسكولات التي تعملها, مش كمان تقول "شنو يا فردة, خمسه مسكولات ما ترد عليها؟ و الله الفيك اتعرفت"

**AHMED** السبت سبتمبر 26, 2009 12:17 am

ود سليمان تسلم على الموضوع ودى هدية منى ليك

الف تحية ليكي من الفؤادِ
بلادي اهلاً .. يا بلادي
صدورنا حماية ليكي من الاعادي

بلادي أنا بلاد ناساً في اول شي
موارثيم..كتاب الله
وخيل مشدود ، وسيف مسنون حداه درع
تقاقيبن تسرج الليل مع الحيران
وشيخاً في الخلاوي ورع

وكم نخلات تهبهب فوق جروفا الساب
وبقرة حلوبة تتضرّع وليها ضرع

وساقيةً تصحي الليل مع الفجراوي
يبكي الليل ويدلق في جداولو دمع
يخدر في بلادي سلام ..
خدرةً شاربة موية النيل تزغرد في البوادي زرع

بلادي سهول بلادي حقول
بلادي الجنة للشافوها او للبرة بيها سمع
بلاد ناساً تكرم الضيف
وحتى الطير يجيها جعان ومن اطراف تقيها شبع

بلاي أنا
تشيل الناس ، كل الناس
وساع بي خيرو لينا يسع
وتتدفق مياه النيل على الوديان
بياض الفضة في وهج الهجير بيشع

بلادي بلاد الصفقة والطمبور
وداراتاً تنح بالليل
وبنوتاَ تحاكي الخيل
يشابن زي جدّي الريل
وشبالن مكنتل في طريفو ودع

بلادي بلاد من التاريخ
من ترهاقا لا عند ميسنا ...
عاد ترجاك خيل ودروع

بلادي أمان ، بلدي حنان وناسا حُنان
يكفكفوا دمعة المفجوع
يحبو الدار يموتو عشان حقوق الجار
يخوضو النار شان فد دمعة
وكيف الحالة لو شافوها سايلة دموع ؟!

ديل اهلي .. ديل اهلي ..

يبدّوا الغير على زاتم
يقسموا اللقمة بيناتم
ويدّوا الزاد حتى ان كان مصيرم جوع

ديل اهلي .. ديل اهلي ..

ديل اهلي .. البقيف في الدارة
وسط الدارة واتنبر
وأقول لي الدنيا كل الدنيا
ديل أهلي

عرب ممزوجة بي دم الزنوج الحارة
ديل اهلي
ديل قبيلتي لما ادور افصل للبدور فصلي

اصحاب روحي والاحساس
وسافر في بحار شوقم زمان عقلي

أقول بعضي ...
ألاقيهم تسرّبوا في مسارب الروح
بقوا كُلي .. ديل اهلي

محل قبلت القاهم ..
معايا .. معايا زي ضلي

كان ما جيت من زي ديل وآسفاي وآماساتي وآآآآآآآذلي

تصور كيف يكون الحال لو ما كنت سوداني
واهل الحارة ما اهلي ؟؟

تصور كيف يكون الحال ؟!!

منقوووووووووووول

**ahmed dirar** السبت سبتمبر 26, 2009 6:52 pm

الف شكر يا ود سليمان ولا اعرف الى اى جنسيه إنتمى إذا لم اكن سودانى
ولى الشرف بان اكون اسوداً سودانياً افريقيا وان انتمى الى الوجوه النيّره
التى تنير هذا المنتدى ,,,,,وليك هذه الهديه الغاليه التى لا تغلى عليك

سوداني الجوه وجداني بر يدو

الحبو علاني وسماه ظلانــــــى
النيلو اروانى ذاد بيه ايمانـــــــــى
* * * * * * *
كرد فان يا غرة خيرك كثير برة
فرسانك الأمراء والفوله راويانى
* * * * * * * * * *
في بربر السلوى وفى الدامر الخـــلوي
في عطبرة الصحوة والعفة كاســـــيا ني
* * * * * * * * * *
بادي الجسور ولدى شال جلــدو من جلدي
قال لي بفداك ولدى من قاضـــــى أو دانى
* * * * * * * * * * * * *
إبداعي يشجيني والفكر يعليني
والحبو يعليني ويعليني بنياني
* * * * * * * * * * * *
بلادنا ذي غيمة في نفوسنا تعظيمه
في العاصمة تنظيمية واللحن أشجاني

* * * * * * * * * *
في مدني طمبارة وفى راجا نقـارة
من كسلا لي بارا والعفة كاسيـا ني
* * * * * * * * *
سوداني الجوه وجداني بريدو

الحال حيكون كيف لو ما كنت سوداني؟؟؟؟؟؟

الحال حيكون كيف لو ما كنت سوداني؟؟؟؟؟؟

رد: الحال حيكون كيف لو ما كنت سوداني؟؟؟؟؟؟

رد: الحال حيكون كيف لو ما كنت سوداني؟؟؟؟؟؟