حكايه مثل سوداني

[right]شن قطعك يا رأس .. مثل سودانى


الهضربة والربربة و رمي الكلام ساكت كثيرا ما يقود صاحبه للمهالك ولنا في السودان مثل معروف يقال في مثل هذه المواقف، المثل يقول :

((شن قطعك يا راس .. قطعني لساني))

وللمثل قصة تروى وحكاية تحكى ..

قالوا كان في عربي مسافر بي حماره وفي الطريق لقى هيكل عظمى انفصل عنه الرأس .. فدفعه فضوله للنزول عن حماره والذهاب للنظر للرأس مستغربا مستعجبا ..

العربي يسأل الراس: سبحان الله والله حاجه تمحن هسي كان سألوك شن قطعك يا رأس؟
فنط الرأس .. ترب .. ترب .. ترب .. لحدي ما وقف قدامه وقال ليهو .. : قطعني لساني !!!!

فذعر العربي وامتلأ رعبا وتحوقل وسبح و قرأ ما يحفظه من قرآن

ومرة أخرى كرر سؤاله : شن قطعك يا رأس ؟؟

الرأس : قطعني لساني ..

و كرر العربي سؤاله عدة مرات وفى كل مرة يجد نفس الإجابة ..

رجع العربي إلي قريته ومن شلاقته وخفته جري لي بيت العمدة وهناك وجد كل أعيان ووجهاء القرية فحكي ليهم حكايته فما كان من العمد إلا أن نهر هذا المخبول وتوعده:

العمدة : يازول على الطلاق نحن بنمشي معاك نشوف الرأس ده لكن و الله لو ما اتكلم الا اقطع راسك الحقك ليهو...

وبالفعل ذهب الجماعة لرؤية الراس و عند وصولهم سأله العربي: شن قطعك يا راس؟؟؟

...... لا توجد أجابه .... ولا حركة .......

وكرر العربي سؤاله مرات ومرات ولا توجد إجابة ... وفى كل مرة يشتعل العمدة غيظا وفى النهاية قطع العمدة رأس العربي ورجع هو ومن معه .... ولما ابتعدوا قليلا .......

قفزت الجمجمة .. ترب .. ترب ... ترب .. ترب ... وواجهت راس العربي الذي لم يجف دمه بعد قائلة: أنا ماااا قلت لييييك قطعني لساني ..



امثالنا السودانيه تحتاج لجمع ودارسه متأنيه وتوثيق .. دمتم بألف خير ..[flash][/flash]