الجالية السودانية بمدينة ميتز METZ الفرنسية
[

[color=red]خجيتو لــــيه ؟؟؟ خليهو يا ادرووووب[/color]

اذهب الى الأسفل

[color=red]خجيتو لــــيه ؟؟؟ خليهو يا ادرووووب[/color]

مُساهمة  wdsuliman في الإثنين مايو 10, 2010 1:23 pm

عليك وجع السنين...
خجيتو ليه؟؟؟
خليهو يا ادروب
عشان ناساً غلآبة وكادحين...
خليهو يا ادروب
عشان ناساً بتحلم من سنين
بوطن صحيح من غير جراح
من غير ألم، من غير انين
خاجيهو ليه؟؟؟
خليهو يا ادروب
عشان شجر الأراك
يفرح يعانق ديم عرب
وترب هدل
ووطن السمآح ينسى الجرآح
ينسى الحصل...
قول ليّ بس...
خاجيهو ليّه؟؟؟
وادوّك كم؟؟؟
مبلغ بِسد رمق الصغار؟
والآ الفتات،
من بعد ما نهبوا الديار؟؟؟
خلوها خاوية على عُروشا
كما الصريم وضح النهآر
لا راعو لطفلاً
بيصرخ في الظلآم...
لا احترمو شيخنا بعد وقآر...
بمدخل الدين...
جونا داخلين التتآر...
خجوها خج...
خج السوآد...
خج الرمآد...
ما خلو شِي
ناس لابتحس، لاتختشي...
ما بين مُرآبي ومُرتشي...
وسفآك دماء نام مُنتشي
من بعد ما لعق الدماء
من بعد ما انتهك الحِمى...
جوغة ضِبآع،
وقطيع سباع متوحشة...
اسرآب نسور
تغتات على جُثث الصغآر...
خجوها خج وضح النهار...
قول ليَّ بس...
خجيتو ليه؟؟؟
وشِن دار تجيب
لي ها الوطن!!!
غير المِحن
غير التخلف والفتن...
غير الشتات
غير العذآب...
غير الكلآب
تنبح تهوهِو ليل نهار
شيخها العجوز دقولو طآر
ينقُز يهِز...
ما راعى في نفسو الوقار
ينفخ نفخ!!!
زي الورر
عامل جعيص...
عامل خطر!!!
قول ليَّ بس...
شِن دار تجيب لى ها الوطن؟؟؟
غير الضياع
غير الفِتن؟؟؟
غير ناس بتعترف النفآق...
عشرين سنة!!!
من الضياع، من العناء
من الألم والعكننة
من الوجع ومُر الضنى...
وبرضك تخُج!!!
يا زول اقيّف...
خلي الوطن
ينجمَّ من رهق السنين...
خلي الغلآبة الكادحين
يرتاحو من طول الأنين
يتنسمو الحُريّة
في الزمن الضنين...
إنصرفو، لا صفى، لا انتِبآه...
يا عُصبة الحُكم اللعيّن...
يا ظآلمين...
يا غادرين...
إلى الجحيّم...
إلى الجحيّم...
avatar
wdsuliman

عدد المساهمات : 26
نقاط : 62
السٌّمعَة : 0
تاريخ التسجيل : 23/09/2009
العمر : 33
الموقع : cruautè de la vie

الرجوع الى أعلى الصفحة اذهب الى الأسفل

رد: [color=red]خجيتو لــــيه ؟؟؟ خليهو يا ادرووووب[/color]

مُساهمة  Admin في الأربعاء مايو 19, 2010 10:01 pm

الغالي ود سليمان
مشكور علي الخجة
وهي قصيدة معاوية المدير الي ادروب إبان انتخابات الوطن الوجع ذو الحروف الخمسة من غير تعريف والسبعة بالالف واللام وزيادة الآلام - السودان -
إليك بلاغة وفصاحة انسان البورت الادروبي البسيط متمثلة في رد الادروبي الانسان ابو محمد ...

رد ادروب للا خ معاويه المدير
إلي الأخ معاويه والي كل الحادبين علي الوطن والحرية هذا ماجاشت به قريحتي في ما فعلناه وهو الشر الذي لابد منه أو مايسمي بالانحناء للعاصفة في وطن أصبح فيه الإنسان يباع ويشتري

تسألني بس خجيتو ليه ؟
ما دار بفكرك غير كده
تسأل منو
تسألني أنا
أسأل هناك ناس فوق
من (عمر) لي و(د حمد)
ناساً سمان ومنفخين نهبونا من كمين سنه
خلونا نحن مرمدين
يقول ليك بس خجيتو ليه
خجيتو شان نحن الحيارة
مقطعين
مابين عطاله وذلتين
ماسمعت يوم بالهندسه
ماقالو فيها مثلثات
اقعد تعال نديك حصص
جهل
ومرض
وافتقار
هذا المثلث منذ كان
ما فاتنا يوم
باقيلنا ايش
باقي الموات
لسع تقول خجيتو ليه
خجيتو شان جونا السمان
قالونا هوي
اما الفقر والحكننه
او تقولو كمان انا
أملأ الصناديق جكنه
لو ما كده
ما فيش وظائف عندنا
لا رواتب لاهنا
لاحتي موية الزير هنا
تمشي وتغادرحينا
كداري بالشارع البعيد
صحراء . رمال. ما يهمنا ؟
والموت عليك محتوم عديل
مين قال كده
ديل السمان ومنفخين
بل حتي حاربنا الامين
لسع تقول خجيتو ليه ؟
ما كان قصدي اخجو خج
والله بس لولا المحن
قالونا بس بالدين عديل
الشغله كلها فرض عين
أي ياتو دين
ما نحن ديل حالفين يمين
والله نحن موظفين ...
ايوه انتو موظفين
والدوله كلها لمنو
مانحن ديل حاكمين سنين
أدوك كم ؟؟
قلت لي كم ؟؟
مين يدي مين
ديل هم حرامية السنين
سرقونا من عشرين سنه
يدونا ايش
غير الكضب والعكننه
عفت يدينا والسنا
إطرانه ايه نعمل كده
غير الجبر والموت عديل
اصل الحكاية مجننه
قالو الفقيه من عهد هود
الموت هناك لو جاك عديل
تأكل الفطيسه وتلعنا
نحن الحكاية الفينا جد
أكل الفطيسه الهينه
والجاي اكثر من كده
امشي النيابة
وكلمهم
افتح بلاغ في كل مكان
كل الصحف
والامكنه
وانا بمشي اشهد ليك نهار
انو الحكاية مزورة
جبرونا بس نعمل كده
مين ؟
كلهم
ناسا سمان ومنفخين..
يادرة الوطن الحزين
العهد بيكم اجمعين
قولتنا حق
لو جاء المبين
ونقوله بالصوت المبين
مين الكانو مزورين
مين اللقال نعمل كده ؟
لو كان راقص او لعين
او حتي شيطان بدقن
فاكرنا نحن مغفلين
ونجدد العهد الدفين
انو الوطن فوق الجبين
ياخائنين يامجرمين ؟
خجيتو خج ..
خجيتو بي ايديا ديل
شاهد ملك
احلف يمين
لما العداله تكون يمين
وانا مابراي
عندك هناك
هيا الشمال
لانقيب شرق
كترة خلوق وموظفين
إقطع قطع
ختم ختم
اشخت شجر
واحد فوق راسهم وقف
اقطع كتير
و(أيلا) يازول منزنق
ماتشيلو هم
نفس الكلام نفس النضم
قالونا دين
لامويه لا كلأ يبين
ياتو دين
يامجرمين ..
واحد يطنطن بتحت
ياجبهجية الشوم
يا وجع السنين
تخلونا نحن مزورين
لكنو بس قدر السماء
والوقت والزمن الخطأ
ولما ن يحين وقت الصواب
ويذهب الزبد الهباب
تلقانا فوق كل الهضاب
نصدح بصوت الحق عديل
هم الكانو مزورين
هم الكانو مزورين

_________________
avatar
Admin
Admin

عدد المساهمات : 73
نقاط : 140
السٌّمعَة : 0
تاريخ التسجيل : 22/09/2009
العمر : 43
الموقع : france/portsudan

http://scmf.mam9.com

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى