الجالية السودانية بمدينة ميتز METZ الفرنسية
[

انضم إلى المنتدى ، فالأمر سريع وسهل

الجالية السودانية بمدينة ميتز METZ الفرنسية
[
الجالية السودانية بمدينة ميتز METZ الفرنسية
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

وثيقة اتهام ضد بص شمبات

اذهب الى الأسفل

وثيقة اتهام ضد بص شمبات Empty وثيقة اتهام ضد بص شمبات

مُساهمة  salahedin osman الثلاثاء فبراير 23, 2010 3:00 pm



احلام الموت واليقظة
وثيقة اتهام مرفوعة نيابة عن ام الحسن بت سعيد من أهالى امبكول ضد بص شمبات .
الأسم : حماد ود سعيد ..وطنو الصغير اسمو امبكول
ميلادو مامعروف متين ..لاكن كبار ناس امبكول
بيقولوا زمن البحر غطى الجروف ..وسنة المدير
الليل صنب ..زار امبكول والعمدة كان ضابح خروف
(بالله في عيد ميلاد اعظم .. من كده ..)
نوع العمل : متوفى قبال عشرة يوم ..
وفى جيبو كان بس خمسطاشر قرش .. وحجاب عشان عين العدا..
وتلاته يوم .. زى اللحوم خاتنو فى التلاجه مجهول الاهل ..
والراديو بعد ( الكافينول)يعلن عن الجثة ويقول :
زول بى شنب وخدود افقى مفصدة ..
فى الجيب خمسطاشر قرش .. وحجاب عشان عين العدا ..
وبعد الشقا ,,ورحلة عذابو من امبكول للعاصمة ..
حمّادنا دابو لقى المصير ..
اما بيكون اصبح صديق شرشل ومارلين ..
والجماعة الفى السعير
ومغازلات ..ومداعبات وفرش حرير ..
ايوة أضحكوا .. والدنيا ايه غير المسرات والضحك
وكلام على الهاتف مع احلى البنات ..
ونعم (لبنسون)والغرام والوشوشات .
وهدية لاحلى البنات قارورة من اغلى العطور
وهدية لى نفسك براك قارورة من اغلى الخمور
تصلب عليها الليل عشان بيك مايطول ..
وأنا بعتذر يااصدقاء
حماد شنو البلدو امبكول .. البفسيدوبوالليل وبهجات العمر
ولزومواإيه لى ناس فى غاية الا نبساط ..ذكر امبكول
ذكر المسائل المابتسر ..
حدثنا عن بهجة مدن ترقص على رنة وتر من الفجر حتى الفجر
حدثنا عن نهدين جناين برتكان حلوين يتحدوا النظر ..
خلينا فى ليل الوشوشات ..ليل البنات ليل الخدر
وأنا بعتذر ياأصدقاء ..
مالسه باقيه ام الحسن .. أختو اللى من أربع سنين
لابسالا توب واحد وحيد..تمشيبو للبكا والفرح
تمشيبو للجار والبعيد..
والله فى يوم ما إشتكت زى البنات قالت قدم دايره الجديد
ماعارفه بين حمّاد وبين دنيا القروش ..تاراً قديم .
من زمن ابوه وجدو والجد الكبير ..فى لحظة مابتصادقوا
ويصعب على حمّاد شقى ام الحسن ..ويتعب شديد
وبرضو القروش مابتلقو ..
ولمّن خلاص ضاقت عليهو الدنيا ..باع التور
واشترى توب جديد لام الحسن ..وشبشب جديد ..وفركة صفيح
ماكان ضنين حمّاد ..ولااستغلي التمن
وحبو الكبير لام الحسن دايماً يزيد
ولمّن خلاص شد الرحال أداها من باقى القروش
عشرين ريال .. من خوف غدر الزمن ..
حمّاد طلع .. حمّاد نزل ..حمّاد عذاباً ضاقو بيهد الجبال
مافيش شغل امشى آسفين كتير امشى وتعال .. آمشى وتعال
ويمشى ويجى ..ويقولوا بكرة تعال .. وبعدو
كآنهم يمتحنوا فى صبر الرجال ..
ولمّن خلاص فضلن فى الجيب خمسطاشر قرش ..وحجاب عشان عين العدا
الدنيا غنت وزغردت .. قبلوه فى البوليس نفر ..
وقالولوترجع لينا تستلم الشغل آخر الشهر ..
فى اللحظة ديك لو حمّاد قدر كان طار عشان يمشى امبكول يدى الخبر
حمّاد سرح .. والله ياام الحسن بعد الشقا الشفتيهو يا مابتسعدى ..
والله لاتسقى البهم لا تحشى قش وللدلكه والدخان تقومى وتقعدى ..
شطح الخيال ..قدامو شاف ام الحسن متدللة ومتبختره ..
وسط البنات فى أحلى توب ..زى العروسة معطرة ..
وفى لحظة بس لاقاهو بص شمبات وحمّاد طار على الارض وإنطرح ..
والدم بحر سال فى التراب من قلب يادوبومحتضن الفرح ..
والدم كتب (والله ياام الحسن بعد الشقا الشفتيهو يامابتسعدى ..
لاتسقى البهم لاتحشى قش .. وللدلكه والدخان تقومي وتقعدى )
والراديو بعد (الكافينول )يعلن عن الجثة ويقول .. زول بى شنب وخدودو
افقى مفصدة ..فى الجيب خمسطاشر قرش وحجاب عشان عين العـــــــــدا..


salahedin osman

عدد المساهمات : 13
نقاط : 50
السٌّمعَة : 11
تاريخ التسجيل : 09/10/2009

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى