الجالية السودانية بمدينة ميتز METZ الفرنسية
[

معاير اختيار شريكه الحياة والاختلاف بين هذاء الجيل والاجيال السابقه

اذهب الى الأسفل

معاير اختيار شريكه الحياة والاختلاف بين هذاء الجيل والاجيال السابقه

مُساهمة  ahmed salheen في الخميس نوفمبر 26, 2009 1:04 am

الليلة دي عايز اتكلم وأناقش وأعمل مقارنة عن كيفية إختيار الزوجة أو الحبيبة بين ناس زمان ( الجاهلية ) وإختلاف معايير الإختيار بين ناس زمان وبعض الاجيال الجديدة .... معليش استحملوني لو طولتا
ناس زمان الجاهليون : كانت عندهم نظرة ثاقبة جداً ( حسب رأيهم طبعا ) .... كانو بيحبو الدسم والسمن البلدي .... ناس هسة بيشوفو الدسم دا بيعمل ليهم تخمة عدييييييل كدة وما بينزل ليهم من حلقم
فناس زمان كانو متفقين كلهم في إنو المرا لازم تكون سمينة ومبغبغة ومتينة و دا دليل على قمة الجمال في نظرم وإنها بت عز وأكل الوز ... فكانو متفقين في المقام الأول إنها تكون سمينة ومتينة ومربربة ودبدووووبة ومكلبظة حتى بعد داك تجي الحاجات التانية جمال الوش والعيون والشعر والذي منو ( أنا عارف في بنات كتيراااااااات كانو يتمنو يعيشو في زمن الناس ديل لكن ضاعت عليهم )
وطبعا الموضوع دا عكسوهو لينا في أشعارم بتاعت الغزل والحب والعشق والهيام لمن يقعد الواحد ويوصف حبيبتو أو زوجة المستقبل وعلى سبيل المثال :
غراء فرعاء مصقول عوارضها تمشي الهوينى كما يمشي الوجي الوحل ( دي جهامة وله عمارة عديل ماشة وتتمايل )
كأن مشيتها من بيت جارتها مر السحابة لا ريث ولا عجل ( فرحي خلق الله وإتني ) تمشي حتة حتة ان شاء الله تصل بعد سنة ما مهم
وتسمع للحلي وسواساً اذا انصرفت .... ( لاحظو زمان ما كان في كعب عالي ولا سراميك مع دبة رجلا في الواطا تسمع رنة الغوايش والحلي ماشة وتكشكش ... كش كش كشلو ودا طبعا من كترة الرجرجة واللحم المدفق بالجنبات وكدا )
أها ناس ( الجيل القبال الحالي ) بيشوفو ناس زمان ديل ناس عبطة ومعاييرم بتاعت الجمال منيلة بستين نيلة وبيحبو الرمرمة ساي وما بفهمو شي في مقاييس وأوصاف الجمال للحبيبة أو الزوجة اللى ممكن يختاروها هم لأنهم كانو معظم الوقت سكرانين وحيرانين غير الخمرا ما عندهم شي عشان كدا ما مركزين ( قال سمينة ودبدوبـــــــــــة قال )
فالجيل القبال الحالي هم بيشوفو المرا السمينة دي آخر حاجة ممكن يفكروا فيها دا لو فكروا أصلا فيها وما إكتفو بكدة وبس كمان بقو ينكتو على السمينة ويظهر دا في بعض اشعار الحلمنتيش عندهم :
ما بخلطك يالكتيرة
يام شلاضيمن كبيرة
يالمتختخة يالمبغبغة يالعويرة
يا ام شلاضمن قرب يا نخرة الكفتيرة
ما بخلطك يا محزق يا مشقق يا لحمن من سيدو دفق
يا زول معسم داير يخنق
ما بخلطك يالقرنتي
الديمة منفوخة وتقنتي
تتكلي فيني ؟ دا ما ياهو البلنتي
أرفس تقول بضارب في ترنتي .... الخ القصيدة
وطبعا ديل ( الجيل القبل الحالي ) بيشوفو انهم أحسن ناس بفهمو في الجمال ما زي ناس زمان عشان كدا كان أول هام عندهم أنو العروسة أو الحبيبة لازم وحتمن ولا بد تكون رشيقة بكل ما تحمله الكلمة من معنى أهم شئ الرشاقة ثم الرشاقة ثم الرشاقة وبعدين تجي باقي الاوصاف التانية الجمال والحسب والنسب والدين وهلم جرا ....
أما الجيل الحالي دا فجيل حكايتو حكاية .... فقد ذهب بعض طائفة من الجيل القبلهم بوصفهم بالحناكيش أو جيل البسكويت والبسبوسة فهم جيل بيحب الميتات بصورة مباااااااالغة خلاص ..... ما عندهم حاجة إسمها جمال في حساباتم إلا من رحم ربي أهم حاجة في إختيارم للعروسة أو الحبيبة في المقام الأول ( هي شغالة شنو وراتبا كم وحتساعدو في المصاريف كيف وبي كم ) دا أهم معيار في اختيارم وبعدين باقي المواصفات زي ما تبقى تبقى وطبعا كل ما كانت وظيفة العروسة محترمة وبتصرف راتب كبير كلما يغض الطرف عن العيوب يعني ما مهم تكون شينة أو سمينة أو حوصا أو ... أو ..... طالما هي دكتورة أو مهندسة أو في وظيفة مرموقة ويا ريت كمان لو كانت وارثة ومرتاااااااحة دي عز الطلب ... دي نمبر ون وما مهم عمرا كم ان شا الله 75 سنة ... بس مهم شوفت فلوسا ( أقصد شوفت عيونا ) .... والمثل الرائج عندهم الكاش بيقلل النقاش
وبمناسبة العروسة عمرا 75 سنة .... قال ليك مراعجوز عمرا 75 سنة ضاعت في الغابة قام قابلا أسد قالت ليهو عليك الله ما تاكلني قال ليها ما تخافي انا ما باكل نواشف ههههههههههههههههههههههههههه .
اذا كان الأسد عندو مقاييس في اختيار الفريسة بتاعتو وبيعرف يفرز الكويس من الكعب يبقى الجيل الحالي دا مالو ( إلا من رحم ربي ) .
دي بعض الرؤى حسب نظريتي المتواضعة واللى أكيد ممكن تختلف مع ناس كتير ولكن اختلاف وجهة النظر لا يفسد للود قضية يعني ... مع محبتي




[

ahmed salheen

عدد المساهمات : 30
نقاط : 92
السٌّمعَة : 0
تاريخ التسجيل : 22/09/2009

الرجوع الى أعلى الصفحة اذهب الى الأسفل

رد: معاير اختيار شريكه الحياة والاختلاف بين هذاء الجيل والاجيال السابقه

مُساهمة  ahmed dirar في الإثنين ديسمبر 28, 2009 4:47 pm

الاخ احمد اراك اتناولت موضوع مهم
وكلها حقائق لكن تفتكر مين الاحسن فى الفئتين

ناس الجاهليه ام الجيل الحالى

وقصة الاسد عجبتنى شديد؟؟؟

ههههههههههههه

_________________
العبد الضعيف لربه
avatar
ahmed dirar
المشرف العام
المشرف العام

عدد المساهمات : 155
نقاط : 199
السٌّمعَة : 0
تاريخ التسجيل : 22/09/2009
العمر : 39

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى